حاول كده سيادتك تتحلى بالإنصاف و ترجع لمنتصف شهر 6 الماضي يعني قبل تلاتي 6 بحوالي 15 يوم . و افتكر كويس جدا الحاجات اللي هاقول لك عليها دي
- افتكر الإحتقان اللي كان موجود في الشارع
- الملتحين و النتقبات اللي كانوا بيضربوا في الشوارع
- حملة تمر و مدى إقبال الناس عليها
- التهييج الإعلامي اللي كان موجود على الشاشات
- قناة الحافظ و برنامج المصطبة بتاع عمه عاطف عبد الرشيد
- برنامج مصر الجديدة بتاع الأستاذ خالد عبدالله
- تصريحات التيار الإسلامي الهوجاء الرعناء . مثل تصريحات عاصم عبدالماجد
-------------------------------------------------------------------------
أدخل بقه قدام شوية هاتلاقي المؤتمر بتاع الريس مرسي . اللي قال فيه الراجل بتاع الكهربا و عاشور بتاع الزقازيق و فودة بتاع المنصورة . و الشرطة رجالة زي الدهب و الجيش رضي الله عنه . ده الخطاب اللي الكل كان منتظر منه حاجة فيه . لكن للأسف كله فشينك . صح ؟ قول صح .
جه سيادة الريس بعديها على طول و عمل حركة محافظين و ضرب كم كرسي كده في الكلوب . و حط محافظ أسيوط جماعة إسلامية و حوالي 4 أو 5 إخوان . على رأسهم بتاع المنوفية الفلولية و الغربية الفلولية و كذلك الإسماعيلية . يعني بيقول للمعارضين إضربوا دماغكم في الحيط . صح ؟ قول صح ..
بعديها الجيش و على راسه عمو السيسي أمهل أسبوع قبل تلاتين 6 علشان نحل المشاكل و نبقه حبايب و نحب بعض علشان ما يتدخلش . يعني الراجل بيحترم المؤسسة اللي هو فيها و مش عايز يضرب ضربة مفاجئة لأ . بيحذر بس .
-----------------------------------------------------------------------------
طيب
مرت الأيام بسرعه بسرعه و لا يزال الدنيا والعة بل ولعت أكتر
الإخوان حشدوا في رابعة . و التيار التاني حشد قدام الإتحادية و كل واحد فرحان بمهرجانة و الكم صييت اللي معاه . و أهو بالنهار على المنصة و بالليل على القناة بتاعته بيضرب في التيار المضاد
و احنا قلنا و عدنا و حذرنا بدل المرة ألف . بلاش الحشد و الحشد المضاد . طلعنا ولاد ستين في سبعين . ما يهمش . صح .؟ قول صح
جه تلاتين 6 و الأمر ازداد تعقيد . و طلع الجيش تاني يوم أمهل الطرفين 48 ساعة . و كان واضح جدا إنه بينحاز للشعب . لكن الإخوان غرروا بالناس و قالوا لهم لأ ده بينحاز للشرعية . صح ؟ قول صح
طلع حزب النور بيان بالليل و قال أول حاجة على الريس يعمل انتخابات رئاسية مبكرة . طلعت ناس و سبت الدين لحزب النور و والله دي أنا قراتها بنفسي و منهم من سب بأبشع الألفاظ ده كله ليه ..؟ علشان مارضيش بالنزول للشارع و قال إن ده خطر كبير على البلد و الدين و الدنيا و كل حاجة و أهمها الدعوة .صح ؟ قول صح
جه 3 يونيو ووقفنا موقفنا الذي اتضح للجميع مدى صحته و مدى إيجابياته و كيف أنقذنا التيار الإسلامي كله . و أحيينا و حفظنا له ماء وجهه صح قول صح ؟
بالله عليك بالله عليك
لو رجعت بيك الأيام ل15/6/2012 . و من بعدها 30/6 و من بعدها 3/7 . هل برضه كنت هاتاخد نفس موقفك اللي أنت فيه دلوقتي و تخسر كل شئ بعدما كان في إيدك كل شئ ؟ و لا هاتتخذ موقف حزب النور ؟؟
هاتتخذ موقف حزب النور صح ؟؟ قول صح
#قول_صح
أبو أسلم السلفي
ليست هناك تعليقات:
إرسال تعليق